நான்கெழுத்துச் சொல்லை வைத்து
ஒரு புதிர் !
தமிழில் ஈடுபாடு மிக்க அறிஞர் பெருமக்கள் பாடல் வாயிலாகவே விடுகதைகள் சொல்வதில் வல்லவர்களாகத் திகழ்ந்தனர். அப்படிப்பட்ட புலவர் ஒருவர் சொன்ன விடுகதை இதோ ! இந்தப் புலவரைப் பற்றிய வரலாறும் கிடைத்தில !
-----------------------------------------------------------------------------------
நாலெழுத்தா மேமத்தி னண்ணுமுத னீக்கிடினோ
வேல்விழியா மிரண்டுவிடி னேநிசியாம் - காற்றலையும்
வல்லபுலி முன்னிரண்டும் வாளியா நான்கி லொன்று
நல்லமதி யீதெனவே நாட்டு.
-----------------------------------------------------------------------------------
சந்தி பிரிக்காமல் எழுதிய நிலையில் பாடலின் பொருளை விளங்கிக் கொள்வது
அத்துணை எளிதன்று ! எனவே உங்களுக்காக இப்பாடலைச் சந்தி பிரித்துத் தருகிறேன் !
-----------------------------------------------------------------------------------
நாலெழுத்தாம் , ஏமம், மத்தி நண்ணும் முதல் நீக்கிடினோ,
வேல்விழியாம், இரண்டு விடின் நிசியாம், - கால் தலையும்
வல்ல புலி, முன் இரண்டும் வாளியாம், நான்கில் ஒன்று
நல்ல மதி, ஈது எனவே நாட்டு !
-----------------------------------------------------------------------------------
கருத்துரை:-
-------------------
நான்கு எழுத்து உள்ள ஒரு சொல் ! இச்சொல்லில் உள்ள முதல் எழுத்தை நீக்கி விட்டால் ”மங்கை” என்று பொருள் படும் . முதல் இரண்டு எழுத்துகளை நீக்கிவிட்டால் “இரவு” என்று பொருள் ஆகும்; முதலெழுத்தும் கடைசி எழுத்தும் சேர்ந்தால் “புலி” என்று பொருள்; முதல் எழுத்தும் இரண்டாவது எழுத்தும் சேர்ந்தால் “அம்பு” என்று பொருள் கிடைக்கும்; நான்கு எழுத்துகளில் ஒன்றை மட்டும் கருதினோமானால் ஒரு மாதத்தின் பெயர் வரும்; இஃது என்ன சொல் என்பதைச் சொல்லுங்களேன் !
-----------------------------------------------------------------------------------
அருஞ்சொற் பொருள்:-
-------------------------------------
முன் இரண்டும் வாளியாம் = முதலிரண்டு எழுத்துகளைச் சேர்த்தால் வரும் “வாளி” என்னும் சொல்லைக் குறிக்கும் (வாளி = அம்பு); நான்கில் ஒன்று = இந்த நான்கு எழுத்துகளில் ஒன்று ; நல்லமதி = நல்ல மாதங்களில்
ஒன்று ! ஈது எனவே நாட்டு = இது தான் அந்த விடை என எனக்குச் சொல்வாயாக !
-----------------------------------------------------------------------------------
ஆக்கம் + இடுகை:
வை.வேதரெத்தினம்,
(maraimani2021@gmail.com)
ஆட்சியர்,
“தமிழ்ப் பொய்கை” வலைப்பூ,
[திருவள்ளுவராண்டு: 2053, ஆடவை (ஆனி)
30]
{14-07-2022}
-----------------------------------------------------------------------------------
கருத்துகள் இல்லை:
கருத்துரையிடுக