மாநிலத்தில் இல்லாத புதுமையைக் கேளடி என் கண்மணி !
பாலாற்றங்கரையில் ஒரு ஊர்; சேண்பாகை என்று பெயர் ! அந்த ஊர் எப்படிப் பட்டது தெரியுமா ? கோங்கு, சண்பகம், கொன்றை, பொற்கூவிளம், மா, தென்னை, வாழை, பலா ஆகிய மரங்கள் சூழ்ந்த சோலைகள் நிறைந்த வளமான ஊர்!
----------------------------------------------------------------------------------------
இந்த ஊரை நிலைக்களமாக வைத்து, ஒரு புலவர் பாடல் ஒன்றைப் படைத்திருக்கிறார். பாடல் வாயிலாகப் புலவர் பேசுகிறார் !
-----------------------------------------------------------------------------------------
”மாங்குயில் போன்ற இனிய குரல் வளம்
மிக்க பெண்ணே ! கேள் ! இந்த மாநிலத்திலேயே இல்லாத
ஒரு புதுமை நிகழ்வு இவ்வூரில் நடந்தேறி இருக்கிறது ! ஆம் ! சேண்பாகையின்
நெருங்கிய தெரு வழியாக யாவரும் பார்க்கும்
வேளையிலே ஒரு எலி மீது யானை ஒன்று அமர்ந்து செல்கிறது. அதன் அருகில் புல் சிதறிக்
கிடக்கிறது ! என்ன வியப்பு இது ? இப்படியும் நடக்குமா ? ”
இதோ அந்தப் பாடல் :-
-----------------------------------------------------------------------------------------
மாங்கு யின்மொழி
கொண்ட வனிதையே
.........மாநி லத்தில் இலாத
புதுமைகேள் !
கோங்கு சண்பகங் கொன்றைபொற் கூவிளம்
..........கோதின் மாதெங்கு வாழை
வருக்கையார்
பாங்கு பால்கதி சூழுஞ்சேண் பாகைவாழ்
..........பன்னும் வீதியில் யாவரும் பார்க்கவே
வீங்கும் ஓரெலி மேலொரு யானைகொல்
.........வெம்பு லிப்பல கொண்டு
நடந்ததே !
----------------------------------------------------------------------------------------
பாடலைச் சந்தி பிரித்து எழுதித் தருகிறேன் !
----------------------------------------------------------------------------------------
மாங்குயில் மொழி
கொண்ட வனிதையே !
..........மாநிலத்தில் இலாத புதுமை
கேள் !
கோங்கு சண்பகம், கொன்றை, பொற்கூவிளம்,
..........கோது இல் மா, தெங்கு, வாழை, வருக்கை ஆர்,
பாங்கு பால்கதி சூழும் சேண்பாகை வாழ்
..........பன்னும் வீதியில்
யாவரும் பார்க்கவே
வீங்கும் ஓர் எலிமேல் ஒரு யானை கொல் !
..........வெம் புலிப் பல கொண்டு
நடந்ததே !
-----------------------------------------------------------------------------------------
எலியின் மேல் யானை அமரமுடியுமா ? அப்படி அமர்ந்தால், எலி
நசுங்கிக் கூழாகித் துறக்கம் (சொர்க்கம்)
போயிருக்காதா? எப்படி அது இயலும் ? சொல்லுங்களேன் !
இந்த அழகிய பாடலை எழுதிய புலவர் பெயர் வரலாற்றில் பதிவாக வில்லை ! வரலாற்றின் பக்கங்களுக்குள் வராத எத்துனையோ புலவர்களுள் இவரும் ஒருவர் !
----------------------------------------------------------------------------------------
ஆக்கம் + இடுகை:
வை.வேதரெத்தினம்,
(maraimani2021@gmail.com)
ஆட்சியர்,
”தமிழ்ப் பொய்கை” வலைப்பூ,
[திருவள்ளுவராண்டு: 2053, ஆடவை (ஆனி)
29]
{13-07-2022}
------------------------------------------------------------------------------------------
கருத்துகள் இல்லை:
கருத்துரையிடுக